Bókmenntasjóður
Bókmenntasjóður var stofnaður með lögum nr. 91/2007. Hlutverk hans er að efla íslenskar bókmenntir og bókaútgáfu. Sjóðurinn rækir hlutverk sitt með því að:
- styrkja útgáfu frumsaminna íslenskra skáldverka og vandaðra rita sem eru til þess fallin að efla íslenska menningu;
- styrkja útgáfu vandaðra erlendra bókmennta á íslenska tungu;
- stuðla að kynningu á íslenskum bókmenntum hér á landi og erlendis og
- sinna öðrum verkefnum er falla undir verksvið stjórnar bókmenntasjóðs.
Bókmenntasjóður tekur við hlutverki Bókmenntakynningarsjóðs, Menningarsjóðs og þýðingarsjóðs. Stjórn bókmenntasjóðs er skipuð af menntamálaráðherra til þriggja ára í senn, tveir samkvæmt tilnefningu Rithöfundasambands Íslands, einn af Félagi íslenskra bókaútgefenda, einn af Hagþenki – félagi höfunda fræðirita og kennslugagna og formaður stjórnarinnar er skipaður án tilnefningar. Einnig leysa lögin um bókmenntasjóð og fleira af hólmi lög um bókasafnssjóð höfunda nr. 33/1997. Í 3. kafla er mælt fyrir um greiðslur til höfunda vegna notkunar bóka þeirra á bókasöfnum.
Sérstök úthlutunarnefnd annast úthlutun. Nefndin er skipuð af mennta- og menningarmálaráðherra til þriggja ára. Hagþenkir – félag höfunda fræðirita og kennslugagna, Rithöfundasamband Íslands og Myndstef tilnefna einn fulltrúa hvert og tveir eru skipaðir án tilnefningar og skal annar vera formaður.
Frekari upplýsingar um sjóðinn er að finna á vefsíðu hans: bok.is