Kærð ákvörðun skólastjóra um brottvísun nemanda - mars 1997

Menntamálaráðuneytinu hefur borist erindi [móður] þar sem kærð er ákvörðun skólastjóra [X -skóla] að vísa [X -nemanda] úr skóla. Telur móðirin að skólastjóri hafi ekki staðið á lögmætan hátt að brottrekstri nemandans og hafi hann ennfremur við meðferð valds síns ekki gætt meðalhófsreglu stjórnsýslulaganna eða þeirra leiðbeiningarskyldu sem á honum hvílir einkum varðandi réttindi barnsins til sérstaks stuðnings í námi. Þá óskar hún ennfremur eftir úrskurði ráðuneytisins um hvort ein kennslustund á dag, þ.e.a.s fimm kennslustundir á viku, falli undir hugtak 4. mgr. 41. gr. grunnskólalaga um annað úrræði sem tryggja beri nemanda sem vikið er úr skóla. Í þriðja lagi óskar [móðirin] úskurðar ráðuneytisins um hvort heimilt sé að víkja nemanda úr skóla um stundarsakir lengur en eina viku án þess að hann hljóti annað kennsluúrræði.

Af þessu tilefni telur ráðuneytið rétt að árétta að ákvörðun um brottvísun nemenda úr skóla telst stjórnsýsluákvörðun í skilningi stjórnsýslulaga nr. 37/1993 og ber því við meðferð slíkra mála að gæta reglna stjórnsýslulaga. Þá ber ennfremur að gæta sérstaklega að málsmeðferðarreglu 41. gr. grunnskólalaga við meðferð slíkra mála.

Með vísan til 3. mgr. 41. gr. grunnskólalaga sem og 2. mgr. 7. gr. stjórnsýslulaga framsendist erindi [móður] til skólanefndar [X-sveitarfélags] til úrlausnar.



(Mars 1997)