Starfsleyfi einkaskóla

Ráðuneytinu barst fyrirspurn um möguleika á að koma á laggirnar foreldrareknum grunnskóla og hvort ráðuneytið myndi veita slíkum skóla starfsleyfi og hvort sveitarfélagi sé skylt að taka þátt í rekstri hans.

56. gr. grunnskólalaga heimilar ráðherra að gefa leyfi til að reka einkaskóla á grunnskólastigi sem kostaðir eru af einstökum mönnum eða stofnunum ef þeir starfa skv. reglugerð eða skipulagsskrá sem ráðuneytið staðfestir. Formlegt erindi þar sem óskað er eftir heimild til reksturs slíks skóla þarf að berast ráðuneytinu. Slíkir skólar hlíta sama eftirliti og reglum og aðrir grunnskólar.

Ráðuneytið hefur mótað eftirfarandi reglur til leiðbeiningar þeim sem óska eftir að fá löggildingu fyrir einkaskóla:

1. Umsókn þarf að vera formleg í bréfi.

2. Reglugerð eða stofnskrá skólans skal fylgja í tvíriti undirrituð af þeim sem bera ábyrgð á skólanum.

3. Reglugerð/stofnskrá skal taka til eftirfarandi atriða:

• Nafn og heimilisfang skólans.
• Hvaða aðili stendur að skólanum, hver er eigandi og ábyrgðaraðili. Allir ábyrgðarmenn skólans skulu undirrita stofnskrá.
• Stjórnskipulag, stjórn og varastjórn, samsetning stjórnar, valdssvið, seturéttur annarra.
• Hvernig fjármagna skal reksturinn og hver ber ábyrgð á fjármálum skólans.
• Að skólinn starfi samkvæmt lögum um grunnskóla og öðrum lögum sem varða grunnskólahald.
• Að fram komi hvernig fara skuli með skuldir/eignir ef skólinn er lagður niður.
• Að skipulagsskránni megi ekki breyta nema með leyfi menntamálaráðherra.

4. Umsækjandi leggi fram eftirfarandi:

• Staðfestingu viðkomandi yfirvalda á hollustu og öryggi húsnæðis og aðstöðu skólans.
• Lýsingu á stefnu, starfsháttum og markmiðum, svo sem með skólanámskrá.

5. Ráðuneytið leitar umsagnar viðkomandi sveitarstjórnar á umsókninni.

6. Ráðherra staðfestir skipulagsskrá með undirritun tveggja stofnskráa. Annað eintakið er sent eigendum, hitt er varðveitt í ráðuneytinu.

7. Ráðuneytið sér um að senda staðfesta skipulagsskrá til birtingar í Stjórnartíðindum.

Einkaskólar eiga ekki kröfu til styrks af almannafé sbr. 56. gr. grunnskólalaga. Það er undir ákvörðun sveitarfélagsins komið hvort það veitir fé til slíks skóla og þeirri ákvörðun verður ekki skotið til menntamálaráðuneytisins.

(Júlí 2001)