Starfsemi nemendaráða í grunnskólum - júní 2002.

Óskað var eftir frekari skýringum á 17. gr. grunnskólalaga um nemendaráð í grunnskólum. Spurt er hvaða rétt skólinn sem uppeldisstofnun hafi til að skipta sér af nemendaráði skólans, t.d. stærð þess, vinnubrögðum, aldri fulltrúa í ráðinu og um ástundun nemendaráðsmanna í námi.

Samkvæmt 17. gr. laga um grunnskóla nr. 66/1995 er nemendum grunnskóla heimilt að stofna nemendaráð sem vinnur m.a. að félags-, hagsmuna-, og velferðarmálum þeirra. Skólastjóri skal fela einum af kennurum skólans að aðstoða nemendaráð. Nemendaráð hvers skóla skal setja sér starfsreglur. Í greinargerð með frumvarpi til grunnskólalaga segir um 17. gr. "Fellt er niður heimildarákvæði um setu fulltrúa nemenda á fundum skólastjóra og kennararáðs og á kennarafundum. Rétt þykir að hafa það í valdi hvers skóla hvernig formlegri aðild nemenda að stjórn skólans er fyrir komið".

Í 14. gr. laganna segir m.a.: "Skólastjóri skal a.m.k. tvisvar á ári boða til sameiginlegs fundar kennararáðs, foreldraráðs og nemendaráðs til þess að veita upplýsingar um skólastarfið og fjalla um málefni þessara ráða".

Engin nánari ákvæði eru í grunnskólalögum um nemendaráð og menntamálaráðuneytið hefur ekki gefið út leiðbeiningar um störf og starfshætti nemendaráða. Ráðuneytið hefur ekki fylgst með framkvæmd þessa lagaákvæðis og hefur ekki upplýsingar um starfsemi nemendaráða við grunnskóla á landsvísu.

Ráðuneytið telur að starfsemi nemendaráða eigi að ákvarðast af nemendum hvers skóla og umgjörð starfseminnar eigi að koma fram í starfsreglum sem nemendur setja sjálfir, innan ramma skólareglna skólans. Vel rekið og virkt nemendaráð er mikilsverður vettvangur fyrir nemendur fyrir félags-, hagsmuna- og velferðarmál þeirra og getur stuðlað að þjálfun í lýðræðislegum vinnubrögðum.

(júní 2002)