Um lestrarnám og læsi - opinn fyrirlestur í Hörpu
Á fjórða hundrað manns hlýða á fyrirlestur Dr. Maryanne Wolf
Bandarískur sérfræðingur um taugafræðilegar forsendur lesturs, dr. Maryanne Wolf, prófessor við Tufts University í Boston og forstöðumaður lestrar- og tungumálarannsóknarstöðvar sama háskóla, flytur opinn fyrirlestur um lestrarnám og læsi í Norðurljósasal Hörpu í dag 27. ágúst 2014 fyrir um 370 gesti. Fyrirlesturinn er á vegum mennta- og menningarmálaráðuneytis í samvinnu við Háskóla Íslands, Háskólann á Akureyri og Samband íslenskra sveitarfélaga.
Í upphafi dagskrárinnar gerði Illugi Gunnarsson, mennta- og menningarmálaráðherra, grein fyrir áherslum ráðuneytisins á lestrarnámi og læsi sem fram koma í Hvítbók mennta- og menningarmálaráðuneytis um umbætur í menntun. Dr. Wolf skiptir fyrirlestri sínum, „We were never born to read: The Story and Science of the Reading Brain“, í tvo hluta og verða umræður eftir hvorn hluta. Háskólarnir og Námsgagnastofnun kynna efni um lestrarmál í kaffihléi.
Hægt er að fylgjast með beinni útsendingu frá fyrirlestrinum sem verður tekinn upp og gerður aðgengilegur á vef ráðuneytisins.
Dagskrá
Kl. 12.45 Skráning
Kl. 13.00 Dagskrárkynning og tónlistaratriði
Kl. 13.15 Illugi Gunnnarsson: Áherslur ráðuneytisins á lestrarnámi og læsi sem fram koma í Hvítbók mennta-og menningarmálaráð-uneytisins um umbætur í menntun
Kl. 13.40 Dr. Maryanne Wolf: „We were never born to read: The Story and Science of the Reading Brain“ – fyrri hluti
Kl. 14.40 Spurningar og umræður
Kl. 15.00 Kaffihlé. Kynningarefni frá háskólunum og Námsgagnastofnun um lestur
Kl. 15.30 Dr. Maryanne Wolf: „We were never born to read: The Story and Science of the Reading Brain“ – síðari hluti
Kl. 16.30 Spurningar og umræður
Kl. 17 Dagskrárlok
Um fyrirlesarann
Dr. Maryanne Wolf hefur stundað viðamiklar taugalíffræðilegar rannsóknir á lestrarferli og lestrarerfiðleikum barna. Hún hefur skrifað yfir 120 vísindagreinar og hlotið fjölmargar viðurkenningar fyrir rannsóknir sínar og störf. Bók hennar, Proust and the Squid: The Story and Science of the Reading Brain, kom út árið 2007 og var valin besta bók ársins um lestur af alþjóðlegum samtökum um lesblindu.
Rannsóknir og störf dr. Wolf spanna vítt svið. Árið 2011 hlaut hún verðlaun fyrir brautryðjandastarf í lestrarkennslu en hún hefur í samvinnu við teymi frá MIT háskóla í Boston og fleiri þróað stafrænt lestrarefni fyrir börn sem hafa engan aðgang að skóla á fjarlægum svæðum í Eþíópíu og Suður-Afríku. Upplýsingar um dr. Maryanne Wolf er m.a. að finna á vef Tufts University í Boston.