Ráðherra og nemendur ræddu framtíð Iðnskólans í Hafnarfirði
Fulltrúar nemenda hittu Illuga Gunnarsson mennta- og menningarmálaráðherra og afhentu honum mótmæli við sameiningu Iðnskólans við Tækniskólann
Nemendur í Iðnskólanum í Hafnarfirði hafa áhyggjur af framtíð skólans og námsins og telja sig ekki nægilega vel upplýsta um hvað bíður þeirra þegar skólahald hefst næsta haust. Þetta kom meðal annars fram í máli fulltrúa nemenda, sem hittu mennta- og menningarmálaráðherra að máli í morgun og afhentu honum lista með nöfnum 283 nemenda, þar sem sameingingaráformum er mótmælt. Þeir lögðu áherslu á að eyða þyrfti allri óvissu um nám þeirra í skólanum. Í máli ráðherra kom fram að skólahald verður með óbreyttum hætti á næstu önn og að nemendur munu ekki finna fyrir breytingum fyrr en síðar og þá vonandi í formi betri þjónustu, kennslu og aðstöðu. Ráðherra lagði áherslu á að markmið sameiningarinnar væri að búa til betri skóla. Ákveðið hefði verið að bíða ekki með ákvarðanatöku í þessu efni en gefa sér hins vegar góðan tíma til að hrinda málum í framkvæmd.
Mótmæli nemendanna eru svo hljóðandi:
„Við undirrituð nemendur í Iðnskólanum í Hafnarfirði erum afar ósátt við hvernig staðið er að málum sameiningu skólanna.
Okkur þykir það ólíðandi að við förum í sumarfrí og vitum ekkert hvernig komandi vetri verður háttað. Öll völdum við þennan tiltekna skóla til þess að nema, af ríkri ástæðu. Við krefjumst þess að hagsmunum okkar og kennaranna verði gætt, og að þessi sameining verði endurskoðuð“.