Starfsmenntun – hvert skal stefna?
Mennta- og menningarmálaráðuneyti stendur fyrir fundaröð vorið 2012 um starfsmenntun undir heitinu Starfsmenntun – hvert skal stefna? Til fundanna er boðið fulltrúum framhaldsskóla og framhaldsfræðslu, starfsgreinaráðum og fulltrúum nemenda og fyrirtækja auk fulltrúa náms- og starfsráðgjafa. Alls er stefnt að því að halda 12 fundi fyrir jafnmarga starfsgreinaflokka og hafa nú þegar verið haldnir sjö fundir.
Markmið fundanna er:
- Að ræða framtíðarsýn starfsnáms með tilliti til uppbyggingar þess
- Ræða hvernig gera má starfsnám sýnilegra og eftirsóknarverðara fyrir nemendur óháð aldri og kyni
- Að efla samskipti og samráð hagsmunaaðila í ljósi breytinga á lögum.
Hér á síðunni verður hægt að finna dagskrá funda, tímasetningu þeirra, glærur sem notaðar hafa verið í fyrirlestrum, samantekt á niðurstöðum funda og loks áherslur fundarmanna í umræðum.
Fundaröðin er liður í ævinámsáætlun Evrópusambandsins (Lifelong learning programme) og nýtur stuðnings þaðan. Hið erlenda heiti verkefnisins er Natlogue, sem er stytting úr National dialogue.
Á næsta ári er ætlunin að halda fundi í einstökum landshlutum og lýkur verkefninu með ráðstefnu um starfsmenntun 23. apríl 2012 þar sem leitast verður við að draga saman niðurstöður fundanna.
Reykjavík, 11. nóvember 2011.
