Samkvæmt lögum er leikskólinn fyrsta skólastigið í skólakerfinu, ætlaður börnum undir skólaskyldualdri.

Rammalöggjöf um leikskóla og starfsemi hans samanstendur af lögum um leikskóla nr. 90/2008, reglugerð um starfsemi leikskóla nr. 225/1995 og aðalnámskrá leikskóla frá 1999.

Menntamálaráðuneyti mótar uppeldisstefnu leikskóla í aðalnámskrá en sérhver leikskóli á sjálfur að skipuleggja starfsemi sína og gera eigin áætlanir sem byggja á markmiðum laga um leikskóla og aðalnámskrá.

Bygging og rekstur leikskóla er í umsjón sveitarstjórna sem er skylt að hafa forystu um að tryggja börnum dvöl á leikskóla. Rammalöggjöfin kveður einnig á um að leikskólar skuli þannig byggðir og reknir að þeir geti jafn vel sinnt og uppfyllt þarfir fatlaðra sem ófatlaðra barna.

Samráðsnefnd leikskóla

Samráðsnefnd um leikskóla er ætlað að vera umræðu- og samstarfsvettvangur aðila um ýmis fagleg málefni leikskóla. Nefndin er skipuð af menntamálaráðherra til tveggja ára og í henni eiga sæti fulltrúar frá menntamálaráðuneyti, Félagi leikskólakennara, Sambandi íslenskra sveitarfélaga og Eflingu-stéttarfélagi.

Úthlutunarnefnd Þróunarsjóðs leikskóla

Samkvæmt reglum um þróunarsjóð leikskóla skipar menntamálaráðherra þriggja manna úthlutunarnefnd til tveggja ára. Úthlutunarnefndin fjallar um umsóknir um styrki úr sjóðnum og gerir tillögur til menntamálaráðherra um ráðstöfun fjármuna úr sjóðnum. Nefndinni er heimilt að leita umsagnar eða álits annarra aðila eftir því sem hún telur þörf á.

Í úthlutunarnefnd eiga sæti fulltrúi menntmálaráðuneytis sem er formaður, fulltrúi tilnefndur af Félagi leikskólakennara og fulltrúi sem tilnefndur er til skiptis af Kennaraháskóla Íslands og Háskólanum á Akureyri.