Jafnréttismál

Í mennta- og menningarmálaráðuneytinu er starfandi jafnréttisráðgjafi. Starfið felst í því að hvetja til almennrar fræðslu um jafnréttismál í skólum, íþróttastarfi, æskulýðsstarfi og menningu. Einnig er ráðgjöf veitt um sértækar aðgerðir til að stuðla að jafnrétti kynjanna og gerð jafnréttisáætlana. Markmið með starfinu er að stuðla að auknu jafnrétti í mennta-, menningar- íþrótta- og æskulýðsmálum og að lögum um jafnrétti kynja innan þessara málaflokka sé fylgt eftir. Starfið er unnið samkvæmt 23. gr. laga nr. 10/2008

• Jafnréttisráðgjafi er Jóna Pálsdóttir jona.palsdottir hjá mrn.is.

Kynungabók

Mennta- og menningarmálaráðuneytið gaf Kynungabók út í ágúst 2010. Bókin inniheldur upplýsingar fyrir ungt fólk um jafnrétti kynja. Markmið með útgáfu Kynungabókar eru að veita raunsæja mynd af stöðu kynjanna í samfélaginu og vekja ungt fólk til umhugsunar um hvernig mismunandi mótun kynjanna út frá menningu, umhverfi og tíma hefur áhrif á líf ungs fólks.

Í ritinu eru hnitmiðaðar upplýsingar úr rannsóknum, gagnagrunnum, lögum og reglugerðum. Nafnið, sem felur bæði í sér tilvísun í kyn og ungt fólk, er gamalt og gilt orð samkvæmt Orðabók menningarsjóðs. Skilgreining orðabókar á orðinu er „að vera af ákveðnu kyni eða sauðahúsi“. Kynungabók er einkum ætluð 15-25 ára ungmennum. Vonir standa til að allir sem koma að uppeldi og kennslu geti nýtt sér efnið.

• Prentuð eintök er hægt að nálgast í afgreiðslu mennta- og menningarmálaráðuneytisins. 
  
• Vefútgáfa: Kynungabók - Upplýsingar fyrir ungt fólk um jafnrétti kynja útg.  25. ágúst 2010.
• Kynungabók í opnu ritvinnsluskjali - síðast uppfært í janúar 2012. Um er að ræða lifandi skjal sem er áfram í vinnslu. Mikilvægt er að ábendingar um allt sem þar má betrumbæta.

Jafnréttisáætlun mennta- og menningarmálaráðuneytis

Mennta- og menningarmálaráðuneytið telur mikilvægt að nýta til jafns þá auðlegð sem felst í menntun, reynslu og viðhorfum kvenna og karla. Jafnréttisáætluninni er ætlað að stuðla að jafnri stöðu og virðingu kvenna og karla innan ráðuneytisins og minna starfsfólk jafnt sem stjórnendur  á mikilvægi þess að allir fái notið sín án tillits til kynferðis.

Í jafnréttisáætlun þessari er gerð grein fyrir jafnréttisnefnd og jafnréttisfulltrúa auk þess sem sett eru fram helstu markmið og aðgerðir ráðuneytisins sem miða að jafnrétti kynjanna.

• Jafnréttisáætlun mennta- og menningarmálaráðuneytis
• Þingsályktun um áætlun í jafnréttismálum til fjögurra ára, samþykkt á Alþingi 19. maí 2011