Úthlutun úr Endurmenntunarsjóði grunnskóla 2002
Úthlutun úr Endurmenntunarsjóði grunnskóla 2002
Úthlutað hefur verið úr Endurmenntunarsjóði grunnskóla í fjórða sinn. Auglýst var í desember 2001 eftir umsóknum og var umsóknarfrestur veittur til 30. janúar 2002. Alls bárust umsóknir um styrki til 152 endurmenntunarverkefna og var samanlögð upphæð þeirra um 53 milljónir króna.
Við mat á umsóknum var miðað við að verkefnin væru til þess fallin að mæta þörfum grunnskólans, að með þeim væri fylgt eftir skólastefnu og aðalnámskrá grunnskóla og að verkefnin fullnægðu kröfum um fagmennsku og gæði.
Stærstu styrkumsækjendur voru skólaskrifstofur. Tillaga sjóðstjórnar fyrir árið 2002 er á þá leið að veittur verði styrkur til 109 verkefna samkvæmt umsóknum fyrir samtals kr. 22.688.500. Sjóðstjórn ákvað auk þess að leggja til að veittur yrði einnar milljón króna styrkur til sérstaks verkefnis vegna aðgerða gegn einelti. Samtals er því úthlutað kr. 23.688.500. Nánari upplýsingar eru á vef menntamálaráðuneytis, menntamalaraduneyti.is