Innritun í framhaldsskóla árið 2006

Innritun í framhaldsskóla fyrir komandi skólaár lauk mánudaginn 12. júní síðastliðinn. Öll innritun í dagskóla fór nú fram á netinu í fyrsta sinn en í fyrra sóttu nemendur 10. bekkjar einir um með rafrænum hætti. Að þessu sinni bárust 6.614 nýjar umsóknir um skólavist í dagskóla þ.e. frá umsækjendum sem ekki voru við nám í framhaldsskólum á vorönn 2006. Alls 4.528 umsóknir voru frá nemendum sem eru að koma beint úr grunnskóla. Það er rúmlega 94% árgangsins. Alls 2.086 umsóknir eru frá einstaklingum sem eru að koma aftur til náms eftir hlé. Auk þess sækja 1.450 núverandi nemendur í framhaldsskólum um að skipta um skóla.

Samkvæmt upplýsingum sem aflað var hjá framhaldsskólunum í byrjun árs gera þeir ráð fyrir að taka inn um 6.800 nýja nemendur í dagskóla á haustönn 2006. Rými er því í skólunum í heild fyrir alla nýja umsækjendur en stærð hvers skóla og fjöldi plássa á námsbrautum, sem krefjast sérhæfðrar aðstöðu og búnaðar, ráða að lokum möguleikum skólanna til að verða við einstökum umsóknum.

Umsóknir nýnema dreifast nokkuð vel í samræmi við stærð skólanna. Þó eru umtalsvert fleiri umsóknir en pláss er fyrir í Verzlunarskóla Íslands, Kvennaskólanum í Reykjavík og Menntaskólanum á Akureyri.

Skólarnir eru byrjaðir að vinna úr umsóknum og gert er ráð fyrir að búið verði að svara öllum umsóknum 23. júní. Umsóknir sem ekki fást samþykktar í þeim skóla sem sótt eru sem fyrsta val eru sendar næsta varaskóla til afgreiðslu. Umsækjendur geta fylgst með afgreiðslu á umsóknarsvæði sínu á netinu.

Nánari upplýsingar veitir: Yfirstjórn menntamálaráðuneytis.