PISA 2006 ráðstefna, Northern Lights lll - Árangur í raungreinum við lok skyldunáms, í Reykjavík 17. - 18. ágúst 2009

Dagana 17. og 18. ágúst var haldin á Grand Hótel Reykjavík ráðstefna á vegum Norrænu ráðherranefndarinnar í samvinnu við menntamálaráðuneytið, um niðurstöður PISA 2006 rannsóknarinnar. Samtímis kom út ný norræn skýrsla um PISA 2006, Northern Lights on PISA 2006, sem gefin er út af Norrænu ráðherranefndinni og unnin af hópi norrænna sérfræðinga.

Þátttakendur á ráðstefnunni koma frá öllum Norðurlöndunum og eru bæði úr rannsóknageiranum og frá ráðuneytum og stofnunum sem hafa með skólamál að gera. Flutt verða mörg erindi um ýmsar hliðar rannsóknarinnar með áherslu á hinar norrænu niðurstöður og samanburð á milli Norðurlanda.

Fyrri dag ráðstefnunnar verður áhersla á frammistöðu nemenda í náttúrufræði og síðari daginn verður meðal annars fjallað um rafrænar prófanir og beinar rannsóknir á því sem gerist í kennslustundum. Einungis Danmörk og Ísland tóku þátt í rafrænni prófun á frammistöðu í náttúrufræði.

Gerð verður grein fyrir niðurstöðu þess hluta rannsóknarinnar og frammistaða á rafrænum prófum borin saman við hefðbundnar prófanir. Að loknum erindum munu þátttakendur taka þátt í umræðum.

Öll Norðurlöndin hafa tekið þátt í PISA frá upphafi og hafa finnskir nemendur ætíð staðið sig best allra. Ísland, Noregur og Danmörk hafa sýnt svipaða frammistöðu, en Ísland hefur skorið sig úr sökum mikils munar á frammistöðu stúlkna og drengja. Ísland er eitt af fáum löndum í allri rannsókninni þar sem stúlkur eru að jafnaði betri í öllum greinum en drengir. Fjallað verður nánar um þennan kynjamun og rætt hvað gæti hugsanlega skýrt hann.

Frammistaða flestra landa í lestri hefur farið versnandi frá árinu 2000 þegar fyrsta rannsóknin var gerð og er sú staðreynd nokkurt áhyggjuefni. Hér á landi er þessi tilhneiging mjög skýr en seint á árinu 2010 eru væntanlegar nýjar niðurstöður í lestri sem varpa frekara ljósi á þróun mála.

• Aðalefni ráðstefnunnar verður árangur í raungreinum á Norðurlöndunum við lok skyldunáms.
• Fyrirlesarar verða höfundar skýrslunnar sem kemur út í tengslum við ráðstefnuna og verður gefin út af Norrænu ráðherranefndinni. Farið verður í gegnum niðurstöðurnar frá ýmsum sjónarhornum og m.a. fjallað um viðhorf nemenda og skólamanna og tengsl raungreina við ýmsar bakgrunnsbreytur. Einnig verður rætt um hvað er líkt og hvað ólíkt með löndunum.

• Ráðstefnan er ætluð þeim sem marka stefnu í skólamálum, kennurum og skólastjórnendum svo og þeim sem fást við rannsóknir á lestri. Ráðstefnan verður haldin á Grand Hóteli í Reykjavík.

• Dagskrá ráðstefnunnar (PDF - 103KB)

• PISA 2006 skýrslan (PDF - 2MB)

• Northern Lights on PISA 2006 - Skýrsla (PDF- 1.2MB)

• Formennskuætlun Íslands í Norrænu ráðherranefndinni 2009