Kennarar - styrkir til námsheimsóknar til Japans

Japönsk stjórnvöld bjóða þrjá styrki til námsheimsókna til Japans til þess að kynnast menntakerfi, menningu og þjóðfélagsmálum. Styrkirnir eru ætlaðir framhaldsskólakennurum og kennurum í 8. - 10. bekk grunnskólans. Heimsóknin stendur í 14 daga og er gert ráð fyrir 214 þátttakendum frá 58 löndum. Lögð er áhersla á að allir, sem koma að heimsókninni, bæði gestir og heimamenn, séu vel mælandi á ensku. Námskeiðið, sem um ræðir, stendur frá 19. júní - 2. júlí næstkomandi.

Styrkurinn tekur til ferðakostnaðar og uppihalds í Japan.

Umsækjendur þurfa að uppfylla annað hvort eftirfarandi skilyrða:

A. Vera kennari á sviði félagsfræða, þ.e. sögu, landafræði, stjórnmálafræði, hagfræði eða alþjóðamála, hafa kennt í 5 ár og gera ráð fyrir að stunda kennslu næstu 10 árin.

B. Vera stjórnandi í skólakerfinu sem hefur forgöngu um námsskrárþróun eða samningu kennslubóka og kennaramenntun.

Umsóknareyðublöð um styrkina má fá í menntamálaráðuneytinu og á vef ráðuneytisins. Nánari upplýsingar gefur skrifstofa menntamála í síma 545 9500.

Umsóknarfrestur er til 20. apríl 2008.