Framhaldsfræðsla
Mennta- og menningarmálaráðuneytið hefur gefið út leiðbeiningar um gerð umsókna um viðurkenningu fræðsluaðila á grundvelli laga og reglugerðar um framhaldsfræðslu.
Mennta- og menningarmálaráðuneytið vill auðvelda fólki aðgengi að námi og auka þátttöku fullorðinna í námi. Mikilvægt er að fullorðnir sem ekki hafa lokið formlegu námi á framhaldsskólastigi eigi kost á öðru tækifæri til náms og fái jafnframt fyrra nám, námskeið og hvers kyns lífs- og starfsreynslu metna til styttingar á námi til fullra námsloka.
Ráðuneytið telur mikilvægt að fólk tileinki sér þá hugsun að menntun er æviverk sem í reynd stendur yfir frá vöggu til grafar. Nám fer ekki eingöngu fram í skólastofunni, heldur einnig á vinnustað, í félagsstörfum, í hversdagslífinu og hvarvetna þar sem fólk dregur lærdóm af nýrri reynslu. Ráðuneytið vinnur að þessum markmiðum með því að:
- styrkja starf fræðslu- og símenntunarmiðstöðva
- gera framhaldsskólum kleift að bjóða upp á nám í öldungadeildum, kvöldnámi- og fjarnámi
- gera þjónustusamning við Fræðslumiðstöð atvinnulífsins sem hefur það markmið að efla framhaldsfræðslu og starfsmenntun í samstarfi við aðrar fræðslustofnanir á vegum aðildarsamtaka Alþýðusambands Íslands, Samtaka atvinnulífsins, BSRB og fjármála- og efnahagsráðuneyti.
- styrkja árlega starf níu símenntunarmiðstöðva á landsbyggðinni og tveggja á höfuðborgarsvæðinu, en þær bjóða upp á fjölbreytt nám, náms- og starfsráðgjöf og raunfærnimat fyrir þá sem vilja styrkja stöðu sína á vinnumarkaði
- styrkja íslenskukennslu fyrir útlendinga sem hafa sest að hér á landi.
