Mennta- og menningarstofnanir á Norðurlandi heimsóttar
Á dögunum fór Katrín Jakobsdóttir mennta- og menningarmálaráðherra til Akureyrar og Húsavíkur og heimsótti þar nokkrar stofnanir og átti fundi með starfsfólki þeirra. Dagurinn var tekinn snemma og hófst með þátttöku ráðherra í farskóla Félags íslenskra safna og safnmanna. Þar kynnti ráðherra efni þingsályktunartillögu um menningarstefnu og nokkrar þær breytingar sem gildistaka nýrra safnalaga mun hafa á starfsemi safna.
Í Menntaskólanum á Akureyri heimsótti ráðherra nokkra bekki og spjallaði við nemendur áður en snæddur var hádegismatur í mötuneyti skólans. Sjónlistamiðstöðin á Akureyri var einnig heimsótt og þar skoðuð sýning með verkum þeirra myndlistarmanna, sem tilnefndir voru til Íslensku sjónlistaverðlaunanna á dögunum.
Næsti viðkomustaður var Framhaldsskólinn á Húsavík þar sem ráðherra ræddi við nemendur og starfsfólk um skólastarfið. Þá var haldið í Menningarmiðstöð Þingeyinga og skoðuð verðlaunasýningin Mannlíf og náttúra – 100 ár í Þingeyjarsýslum.
Ferð ráðherra lauk í Þekkingarneti Þingeyinga þar sem hann kynnti sér starfsemina og afhenti formlega viðurkenningu fræðsluaðila samkvæmt lögum nr. 17/2010 um framhaldsfræðslu. Þekkingarnetið er fyrst framhaldsfræðslustofnana til að hljóta þessa viðurkenningu sem verður á næstu misserum ein af grunnforsendum opinbers stuðnings við framhaldsfræðslu á landinu.