Menningarstefna í mannvirkjagerð skýtur fastari rótum
Mennta- og menningarmálaráðuneyti hafði frumkvæði að því árið 2007 að gefa út Menningarstefnu í mannvirkjagerð, en þar er sett fram á metnaðarfullan hátt stefna íslenskra stjórnvalda í byggingarlist. Í stefnunni segir m.a. að sjálfbærni og vistvæn sjónarmið krefjist nýrra nálgana við skipulag, hönnun og framkvæmdir og lögð er áhersla á að opinberir aðilar séu í forystu í þessum efnum og setji sér metnaðarfull markmið.
Á vegum ráðuneytisins eru nú þrjár nýbyggingar á hönnunar- eða framkvæmdastigi, sem allar fara í gegnum alþjóðlegt umhverfisvottunarferli. Þessar byggingar eru Hús íslenskra fræða og Stofnun Vigdísar Finnbogadóttur og Framhaldsskólinn í Mosfellsbæ.
Mennta- og menningarmálaráðherra undirritaði í dag Nordic Built sáttmálann ásamt fulltrúum þeirra arkitekta- og verkfræðistofa, sem unnið hafa að hönnun framangreindra bygginga. Auk þeirra undirrituðu sáttmálann fulltrúar Framkvæmdasýslu ríkisins og Fasteigna ríkissjóðs.
Nordic Built er norrænt samvinnuverkefni sem hvetur til þróunar samkeppnishæfra lausna í vistvænni mannvirkjagerð. Alþjóðleg umhverfisvottun bygginga fellur sérstaklega vel að öllum 10 meginreglum Nordic Built sáttmálans. Með þeirri hugmyndafræði, sem þar er sett fram, er við sköpun á manngerðu umhverfi leitast við að auka lífsgæði, nýta sjálfbærni, staðbundnar auðlindir og byggja á norrænni hönnunarhefð eins og hún gerist best. Með undirrituninni í dag er því skotið enn fastari rótum undir Menningarstefnu í mannvirkjagerð.
Norræna ráðherraráðið fjármagnar verkefnið ásamt Nordic Innovation, sem einnig er í forsvari fyrir framkvæmd þess í samvinnu við Norðurlöndin. Verkefnið miðar að því að Norðurlöndin nái markmiðum sínum um að vera leiðandi í nýsköpun, grænum hagvexti og velferð. Með því að hvetja til samvinnu á milli landa og atvinnugreina er stofnað til nýstárlegs samstarfs sem skila á nýsköpun í byggingariðnaði.
Nordic Built verkefnið er eitt af sex svonefndum kyndilverkefnum sem stofnað var til í tengslum við mótun nýrrar stefnu um samvinnu í iðnaðar- og nýsköpunarmálum, með áherslu á grænan vöxt, sem norrænu viðskipta- og iðnaðarráðherrarnir samþykktu í október 2011.
Á myndinni eru frá vinstri: Kristján Garðarsson, Katrín Jakobsdóttir, Óskar Valdimarsson, Aðalheiður Atladóttir, Ögmundur Skarphéðinsson, Snævar Guðmundsson, Magnús Kristbergsson, Þorlákur Jónsson og Þráinn Sigurðsson.