Samstarf skóla og barnaverndar
Hafin er vinna við gerð verklags sem ætlað er að efla samstarf barnaverndar og skóla um undirbúning skólagöngu fósturbarna og eftirfylgd. Verklagið byggir á Reglugerð um skólagöngu fósturbarna í grunnskólum frá 5. júní 2012. Skólaganga fósturbarna hefur lítið verið rannsökuð hér á landi en niðurstöður nýlegrar meistaraprófsritgerðar í félagsráðgjöf benda til þess „... að bæta þurfi enn frekar framkvæmd, verklag og upplýsingamiðlun milli grunnskóla og barnaverndar þegar kemur að fósturráðstöfunum“ (http://skemman.is/handle/1946/13566). Verkefnið er hluti af stærri rannsókn á vegum Rannsóknastofnunar í barna- og fjölskylduvernd (RBF).
Í maí 2012 stóð Barnaverndarstofa í samstarfi við Skólastjórafélag Íslands, Samband íslenskra sveitarfélaga, Samtök félagsmálastjóra, Skóla- og frístundasvið Reykjavíkur og Barnavernd Reykjavíkur fyrir ráðstefnu um mikilvægi samstarfs skóla og barnaverndar og tóku um 200 manns þátt í henni. Hér eru nánari upplýsingar um ráðstefnuna ásamt dagskrá, fyrirlestrum og upptöku.