Evrópskt kvikmyndasamstarf

“Eurimages”, kvikmyndasjóður Evrópuráðsins veitti 320 þúsund evrum til til lokafjármögnunar á nýrri mynd eftir Dag Kára Pétursson “Rocketman” í lok síðasta árs.

Um 20 íslenskar umsóknir bárust MEDIA áætlun ESB á síðasta ári og báru nokkrar þeirra árangur. Endanlegar upplýsingar um úthlutanir árið 2012 eru enn ekki fyrirliggjandi en þegar hefur verið staðfest að fjárframlög til íslenskra fyrirtækja í kvikmyndageiranum árið 2012 voru um 222.500 evrur eða ríflega 36 millj. kr. 

Árið 2012 var 20. árið sem MEDIA upplýsingaþjónusta á Íslandi er starfrækt, en Íslendingar fengu aðgang að áætluninni haustið 1992. Á þessum tíma hefur verið úthlutað um 900 millj. kr. til íslenskra fyrirtækja til að undirbúa gerð kvikmynda og til framleiðslu þeirra, og til íslenskra dreifenda til að sýna um 100 evrópskar kvikmyndir hér á landi.  Þá hefur um 260 millj. kr. verið veitt til að styrkja sýningar á 12 íslenskum kvikmyndum í 27 löndum.

Í janúar 2012 voru liðin 22 ár síðan Íslendingar byrjuðu að taka þátt í Eurimages, kvikmyndasjóði Evrópuráðsins. Frá byrjun hafa 27 íslenskar kvikmyndir fengið úthlutað 6.311 þúsund evrum eða rúmum milljarði króna til framleiðslu. Þá hafa íslensk framleiðslufyrirtæki tekið þátt í framleiðslu 11 evrópskra kvikmynda sem samtals fengu úthlutað 4.373.081 evrur eða um 700 millj. kr og hefur hluti þeirrar upphæðar verið úthlutað til íslensku framleiðslufyrirtækjanna og ráðstafað hér á landi. Þá hafa níu íslenskar kvikmyndir fengið styrki uppá tæpar 120 þúsund evrur til að færa þær á stafrænt form og tveir dreifingarstyrkir hafa borist til dreifingar á íslenskri kvikmynd að fjárhæð 12.500 evrur.

Sigríður Margrét Vigfúsdóttir hefur verið fulltrúi Íslands í MEDIA áætluninni frá upphafi. Hún hefur setið í stjórn Eurimages frá 2002 og tekur nú aftur sæti í 6 manna framkvæmdastjórn sjóðsins, sem hún átti sæti í árin 2006 – 2008, fyrst Íslendinga.