Fjarmenntaskólinn - samstarf um fjarnám á sviði starfsmenntunar
Sjö framhaldsskólar á landsbyggðinni hafa ákveðið að bjóða sameiginlega upp á fjarnám með áherslu á starfsnám.
Sjö framhaldsskólar á landsbyggðinni hafa ákveðið að bjóða sameiginlega upp á fjarnám með áherslu á starfsnám. Um er að ræða Fjölbrautaskóla Snæfellinga, Fjölbrautaskóla Norðurlands Vestra, Menntaskólann á Tröllaskaga, Framhaldsskólann á Húsavík, Menntaskólann á Egilsstöðum, Verkmenntaskóla Austurlands og Framhaldsskólann í Austur-Skaftafellssýslu. Í vor verður áhugi kannaður á námi á 15 námsbrautum og í kjölfarið tekin ákvörðun um hvað verður í boði á haustönn. Námið fer fram með stuttum staðbundum lotum og í fjarnámi. Miðað er við að hægt sé að taka námið samhliða vinnu. Markmið skólanna er einkum að auka framboð á framhaldsskólanám á starfssvæði skólanna og á landinu öllu með hagkvæmum hætti.
Í samstarfsyfirlýsingu um Fjarmenntaskólann segir:
„Fjölbrautaskóli Snæfellinga, Fjölbrautaskóli Norðurlands vestra, Menntaskólinn á Tröllaskaga, Framhaldsskólinn á Húsavík, Menntaskólinn á Egilsstöðum, Verkmenntaskóli Austurlands og Framhaldsskólinn í Austur-Skaftafellssýslu lýsa yfir vilja sínum til að bjóða sameiginlega upp á fjarnám á framhaldsskólastigi undir merkjum Fjarmenntaskólans með áherslu á sérgreinar starfsnámsbrauta. Jafnframt lýsa skólarnir yfir vilja til að gera formlegan samstarfssamning um fjarkennslu á framhaldsskólastigi með það markmiði að auka þjónustu við nemendur á starfssvæði skólanna og á landinu í heild“.
- Nánari upplýsingar er að finna á vef Fjarmenntskólans fjarmenntaskolinn.is og hjá Eyjólfi Guðmundssyni skólameistara Framhaldsskólans í Austur-Skaftafellssýslu, [email protected], 4708070, 8602958.