Dagskrá viku móðurmálsins 21.–28. febrúar 2014
Tungumálaforða Íslands leitað í skólum landsins. Um 100 móðurmál eru töluð á Íslandi. UNESCO leggur ríka áherslu á réttinn til móðurmálsins og mikilvægi þess fyrir einstaklinginn og menningu þjóða.
Í tilefni af Alþjóðadegi móðurmálsins verður efnt til nokkurra viðburða dagana 21.–28. febrúar nk. í því skyni að minna á réttinn til móðurmálsins og vekja leika og lærða til vitundar um mikilvægi móðurmáls fyrir einstaklinga og menningu þjóða. Að dagskránni standa Íslenska UNESCO-nefndin og Stofnun Vigdísar Finnbogadóttur í erlendum tungumálum, í samvinnu við fjölmörg samtök, stofnanir og aðra sem láta sig málið varða.
Um 100 móðurmál eru töluð á Íslandi. UNESCO leggur ríka áherslu á réttinn til móðurmálsins og mikilvægi þess fyrir einstaklinginn og menningu þjóða.
- Tungumálaforða Íslands leitað í skólum landsins: www.tungumalatorg.is
Íslenska er móðurmál flestra sem búa á Íslandi en alls ekki allra. Margir eru tví- eða fjöltyngdir. Öll móðurmál og önnur mál sem töluð eru á Íslandi og erlend tungumál sem við lærum í skólum mynda saman tungumálaforða Íslands. Hann er okkur dýrmætur. Ríkulegur tungumálaforði endurspeglar fjölbreytta menningu og er lykill að farsælum samskiptum við umheiminn.
Í tilefni Alþjóðadags móðurmálsins, 21. febrúar, verður hrint af stað leik sem gengur út á að leita uppi þau móðurmál sem eru töluð í skólum víðs vegar um landið og kanna hve miklum tungumálaforða skólar búa yfir. Á heimasvæðinu www.tungumalatorg.is/ eru nemendur einstakra bekkja og skóla hvattir til að skrá öll móðurmál sín. Þannig fást upplýsingar um tungumálaforða hvers skóla og með því er hægt að fá yfirlit yfir tungumálaforðann á einstökum landsvæðum og á landinu í heild. Þeir skólar sem búa yfir miklum tungumálaforða fá sérstaka viðurkenningu.
- Sögustund fyrir börn á 10 tungumálum
Föstudaginn 21. febrúar, kl. 13.-15 stendur Borgarbókasafn, Gerðubergi fyrir sögustund fyrir börn á 10 ólíkum tungumálum.
- Fyrirlesturinn: Danska sem móðurmál, annað mál og erlent mál
Fimmtudaginn 27. febrúar, kl. 16.00 flytur doktor Bergþóra Kristjánsdóttir, lektor við Árósaháskóla, fyrirlestur um stöðu mismunandi tungumála sem móðurmáls í Danmörku. Fyrirlesturinn fer fram í Háskóla Íslands, í stofu 101 í Odda.
- Móðurmál - mál málanna
Málþing í Norræna húsinu föstudaginn 28. febrúar kl. 15-17.
Fjallað verður um móðurmálið út frá ólíkum sjónarhornum. Dagskrá:
- Hólmfríður Garðarsdóttir, forseti Deildar erlendra tungumála, bókmennta og málvísinda við Háskóla Íslands : Tungumál eru sameign okkar allra – ræktum þau!
- Renata Emilsson Pesková, formaður Móðurmáls, félags tvítyngdra barna: Öll mál skipta máli – en fyrir hverja ?
- Hanna Ragnarsdóttir, prófessor í fjölmenningarfræðum við Háskóla Íslands: Tungumál sem auðlind – fjölbreyttir kennarahópar.
- Þorbjörg Þorsteinsdóttir, verkefnisstjóri Tungumálatorgs: Dýrmætur tungumálaforði .
- Jón Torfi Jónasson, prófessor við kennaradeild Menntavísindasviðs Háskóla Íslands og formaður íslensku UNESCO-nefndarinnar.
Móðurmálsdagurinn myndbönd!
http://www.youtube.com/islenskaunesco