Kynlegt ferðalag – námskeið um kynjamennt
Vitundarvakning um kynferðislegt, andlegt og líkamlegt ofbeldi gegn börnum og Námsgagnastofnun héldu námskeiðið „Kynlegt ferðalag“ - námskeið um kynjamennt þvert á námsgreinar fyrir kennara á mið- og unglingastigi. Námskeiðið byggir á grundvelli Pestalozzi-áætlunar Evrópuráðsins um starfsþróun og þjálfun kennara.
Námskeiðið var vel sótt af kennurum og öðrum fagaðilum sem vilja fjalla um málefni kynjanna og jafnrétti á virkan og fjölbreyttan hátt með nemendum sínum. Námskeiðið byggðist á þátttöku og hugmyndum þeirra sem það sóttu. Kennurum gafst tækifæri til að reyna fjölbreyttar, skapandi og virkar aðferðir í námi og kennslu. Á dagskrá námskeiðsins var m.a. kynlegt bingó, troðið á klámi og hugtök sem við hikstum á.
Markmið námskeiðsins var að efla færni og sjálfstraust kennara til þess að fjalla um og sinna kynjamennt á opinn, virkan, jákvæðan og fordómalausan hátt, að kennarar skilgreini helstu þætti sem mikilvægt er að fjalla um í kynjamennt og að kennarar geti yfirfært og þróað aðferðir og hugmyndir sem kynntar eru á námskeiðinu í sínu starfsumhverfi.
Námskeiðið var haldið í mennta- og menningarmálaráðuneytinu og var það endurgjaldslaust. Hér fyrir neðan eru svipmyndir af námskeiðinu.