Samningar undirritaðir við ÍSÍ

Illugi Gunnarsson mennta- og menningarmálaráðherra og Lárus Rafn Blöndal forseti Íþrótta- og Ólympíusambands Íslands undirrituðu samninga um fjárframlög til ÍSÍ

Illugi Gunnarsson mennta- og menningarmálaráðherra og Lárus Rafn Blöndal forseti Íþrótta- og Ólympíusamband Íslands undirrituðu samninga um ráðstöfun á framlögum á fjárlögum til rekstrar ÍSÍ, Afrekssjóðs ÍSÍ, Ferðasjóðs íþróttafélaga fyrir íþrótta- og ungmennafélög innan ÍSÍ og til starfsemi sérsambanda ÍSÍ.

Í samningi um rekstarframlag til ÍSÍ segir að markmiðið með stuðninginum sé að stuðla að því að landsmenn eigi þess kost að iðka íþróttir við sem hagstæðust skilyrði og sem tekur mið af gildi íþróttaiðkunar fyrir uppeldis- og forvarnastarf eins og kveðið er á um í íþróttalögum. ÍSÍ er ætlað að efla, samræma og skipuleggja íþróttastarfsemi í landinu. Það á að veita sérsamböndum, héraðssamböndum og íþróttafélögum aðstoð, standa fyrir fræðslu, vera æðsti aðili frjálsrar íþróttastarfsemi í landinu og í erlendum samskiptum íþróttahreyfingarinnar auk þess að bera m.a. ábyrgð á þátttöku Íslands í Ólympíuleikum. Á samningstímanum skulu samningsaðilar taka mið af stefnumótun ráðuneytisins í íþróttamálum sem gefin var út árið 2011 og gildir til 2015.

Afrekssjóður hefur m.a. það hlutverk að veita styrki til fremsta íþróttafólks þjóðarinnar í því skyni að efla árangur íslensks afreksfólks á alþjóðavettvangi. Samningurinn kveður á um fjárframlag úr ríkissjóði.

Markmið Ferðasjóðs íþróttafélaga fyrir íþrótta- og ungmennafélög innan ÍSÍ er að koma til móts við íþróttafélög vegna kostnaðar þeirra af  ferðalögum innanlands, sérstaklega þeirra sem eiga um langan veg að fara til þess að taka þátt í viðurkenndum mótum. Markmið sjóðsins er einnig að stuðla að öruggum ferðamáta íþróttafólks. Með samningnum er ÍSÍ falin umsjón og umsýsla sjóðsins.

Hlutverk sérsambanda ÍSÍ er m.a. að efla mótahald, útbreiðslu og fræðslu í viðkomandi íþróttagrein á landsvísu, auka upplýsingagjöf um íþróttastarf og koma fram erlendis fyrir hönd viðkomandi íþróttagreinar. Sértæk markmið hverrar íþróttagreinar eru skilgreind í markmiðasamkomulagi við viðkomandi sérsamband fyrir sig skv. úthlutunarreglum ÍSÍ. Með samningi ráðuneytisins við ÍSÍ er veittur stuðningur við sérsamböndin.