Viðurkenning háskóla á Íslandi
Í dag var haldin athöfn í Þjóðmenningarhúsi þar sem Þorgerður Katrín Gunnarsdóttir menntamálaráðherra gerði niðurstöður viðurkenningarferilsins opinberar.
Umsóknum háskóla um viðurkenningu var skipt í tvennt. Þann 3. mars 2007 var sótt um á fjórum fræðasviðum: hugvísindum, listum, náttúruvísindum og verk- og tæknivísindum. Í september 2008 bárust ráðuneytinu umsóknir á sviðum auðlinda- og búvísinda, heilbrigðisvísinda og félagsvísinda.
- Háskóli Íslands sótti um viðurkenningu á öllum framangreindum fræðasviðum að undanskildum auðlinda- og búvísindum.
- Háskólinn í Reykjavík, sótti um á tveimur fræðasviðum: verk- og tæknivísindum og félagsvísindum.
- Háskólinn á Akureyri sótti um á viðurkenningu á sviðum félagsvísinda, heilbrigðisvísinda og auðlinda- og búvísinda.
- Landbúnaðarháskóli Íslands sótti um á sviðum náttúruvísinda og auðlinda- og búvísinda.
- Kennaraháskóli Íslands sótti um á sviðum félagsvísinda, sem kennaramenntunin fellur undir,
- Háskólinn á Bifröst á sviðum félagsvísinda,
- Háskólinn á Hólum á sviðum auðlinda- og búvísinda
- Listaháskóli Íslands sótti um á sviði lista.
Viðurkenning felur í sér að menntamálaráðuneyti vottar að viðkomandi háskóli uppfylli þær lágmarkskröfur sem ráðuneytið gerir til hans á grundvelli laga um háskóla.
Við skipulag verkefnisins var tekið mið af alþjóðlegum viðmiðum um mat og úttektir. Til að tryggja hlutleysi menntamálaráðuneytis í ferlinu öllu voru óháðir, erlendir sérfræðingar skipaðir í úttektarnefndirnar og Rannsóknarmiðstöð Íslands falin öll umsýsla verkefnisins.
Við val á fulltrúum í sérfræðinefndirnar var leitað eftir ráðgjöf hjá fremstu matsstofnunum í Evrópu og Norður-Ameríku. Gerðar voru miklar hæfniskröfur og reynt eftir megni að fá til verksins hæfustu sérfræðinga sem völ er á. Meðal þeirra sem áttu sæti í nefndunum má nefna Christian Thune, fyrrum forseta samtaka evrópska matsstofnana, ENQA, en hann stýrði m.a. því verkefni að gefa út sameiginlega staðla fyrir gæðaeftirlit innan evrópska háskólasvæðisins.