Nýr samstarfssamningur mennta- og menningarmálaráðherra og Heimilis og skóla - landssamtaka foreldra undirritaður

Mennta- og menningarmálaráðherra, Katrín Jakobsdóttir, og formaður Heimilis og skóla, Sjöfn Þórðardóttir, undirrituðu samstarfssamning, þriðjudaginn 29. júní, vegna stuðnings samtakanna við foreldra skólabarna. Ráðherra sagði við það tækifæri að mikilvægt væri að hafa öflug landssamtök foreldra sem gætu stutt við foreldrastarf í skólum og jafnframt veitt foreldrum margvíslega ráðgjöf og stuðning. Samtökin hefðu einnig mikilvægu hlutverki að gegna sem talsmenn nemenda við stefnumótun í menntamálum. Ráðherrann nýtti tækifærið til að kynna sér starfsstöðvar Heimilis og skóla, hitti stjórnarmenn og starfsfólk og kynnti sér starfsemina.
Meginmarkmið Heimila og skóla - landssamtaka foreldra er að stuðla að bættum uppeldis- og menntunarskilyrðum barna með því að hvetja til og styðja við jákvætt og öflugt samstarf heimila og skóla. Enn fremur er markmiðið að styðja við foreldra í uppeldishlutverki sínu og veita þeim stuðning og hvatningu til virkrar þátttöku í skólastarfi, efla foreldrasamstarf með stuðningi við skóla, foreldraráð, skólaráð og foreldrafélög, taka þátt í stefnumótun um skóla-, fjölskyldu-, æskulýðs- og tómstundamál og koma sjónarmiðum foreldra á framfæri við yfirvöld.