Kynning á „sjúkraliðabrú”

Til framhaldsskóla.

Vísað er til námskrár sjúkraliðabrautar, sem tók gildi með auglýsingu nr. 661/2004 um breyting á aðalnámskrá framhaldsskóla, sbr. einnig aðalnámskrá framhaldsskóla - brautalýsingar frá ágúst 2004. Nám á sjúkraliðabraut er 120 einingar, þar af er vinnustaðanám 15 einingar og starfsþjálfun 16 vikur.

Með vísan til ákvæða kafla 7.6 um mat á óformlegu námi og starfsreynslu í aðalnámskrá framhaldsskóla vill menntamálaráðuneyti koma á framfæri eftirfarandi viðmiðun um mat á óformlegu námi einstaklinga er starfað hafa við umönnun sjúklinga án þess að hafa lokið formlega námi af sjúkraliðabraut. Einstaklingar sem orðnir eru 23 ára, hafa 5 ára starfsreynslu og meðmæli frá vinnuveitanda sínum eiga þess kost að fá metið nám og starfsreynslu sem hluta af námi á sjúkraliðabraut. Miðað er við að viðkomandi hafi að jafnaði starfað við umönnun aldraðra, sjúkra eða fatlaðra og hafi auk þess lokið starfstengdum námskeiðum á vegum stéttarfélaga, sveitarfélaga og/eða annarra aðila sem hafa það markmið að auka kunnáttu og færni til starfa á hjúkrunarsviði. Nám það sem hér um ræðir og er að umfangi á bilinu 230-260 stundir skal jafngilda 12 einingum af sérgreinum sjúkraliðabrautar og stytta námið hlutfallslega í samræmi við það. Starfsreynsla í umönnunarstörfum er metin sem hluti af náminu.

Þeir sem óska eftir mati samkvæmt ofansögðu skulu að lágmarki ljúka 60 eininga sérgreinanámi sjúkraliðabrautar svo sem nánar er tilgreint á meðfylgjandi blaði, svo framarlega sem þeir hafi ekki lokið námi í þeim áföngum áður. Sérstök athygli er vakin á meðfylgjandi áfangalýsingum vinnustaðanámsins.

Fyrir hönd ráðherra

 Sólrún Jensdóttir
  
   
   
 
  
Sigurjón Mýrdal