Illugi Gunnarsson nýr mennta- og menningarmálaráðherra
Illugi er fæddur á Siglufirði árið 1967. Hann hefur BS-gráðu í hagfræði frá Háskóla Íslands og MBA-gráðu frá London Business School. Árið 2007 tók hann sæti fyrir Sjálfstæðisflokk á Alþingi og var formaður þingflokks sjálfstæðismanna 2009-2010 og aftur árið 2012. Hann sat í efnahags- og skattanefnd 2007, fjárlaganefnd 2007-2009 og 2011-2012, menntamálanefnd 2007-2009, umhverfisnefnd 2007-2009, viðskiptanefnd 2010-2011 og allsherjarnefnd 2010-2011. Þá átti hann sæti í Íslandsdeild þingmannanefndar EFTA 2007-2009 og Íslandsdeild Norðurlandaráðs 2009-2010 og 2011-2013.
Illugi er giftur Brynhildi Einarsdóttur sagnfræðingi og þau eiga eina dóttur, Guðrúnu Ínu, fædd 2012.